വാഷിംഗ്ടൺ: ഇസ്രായേലിനെതിരായ ഇറാൻ്റെ തുടർച്ചയായ ആക്രമണങ്ങൾക്ക് ശക്തമായ മുന്നറിയിപ്പുമായി മുൻ അമേരിക്കൻ പ്രസിഡൻ്റ് ഡോണൾഡ് ട്രംപ് രംഗത്ത്. തങ്ങളെ ആക്രമിക്കാൻ ഇറാൻ ഒരുങ്ങിയാൽ, അമേരിക്കൻ സൈന്യത്തിൻ്റെ മുഴുവൻ ശക്തിയും പ്രയോഗിച്ച് തിരിച്ചടിക്കുമെന്ന് ട്രംപ് മുന്നറിയിപ്പ് നൽകി. “ആക്രമിച്ചാൽ, എൻ്റെ മുഴുവൻ സൈന്യവും നിങ്ങളുടെ മേൽ പതിക്കും” എന്ന് ട്രംപ് പറഞ്ഞു.
ടെഹ്‌റാനും വാഷിംഗ്ടൺ ഡിസിയും തമ്മിലുള്ള ആറാം റൗണ്ട് ആണവ ചർച്ചകൾ ഇറാൻ റദ്ദാക്കിയതിന് പിന്നാലെയാണ് ട്രംപിൻ്റെ ഈ പ്രതികരണം. ഇസ്രായേൽ നടത്തിയ ആക്രമണങ്ങളിൽ ഇറാനിൽ കനത്ത നാശനഷ്ടങ്ങൾ ഉണ്ടായിട്ടുണ്ടെന്നും, അടുത്ത ആക്രമണം ഇതിലും ക്രൂരമായിരിക്കുമെന്നും ട്രംപ് നേരത്തെ സമൂഹമാധ്യമങ്ങളിൽ കുറിച്ചിരുന്നു. ഒന്നും അവശേഷിക്കാതെ ആകുന്നതിനു മുൻപ് ഇറാൻ ആണവ കരാറിന് തയാറാകണമെന്നും അദ്ദേഹം ആവശ്യപ്പെട്ടു.
ഇസ്രായേൽ ആക്രമണത്തെ ട്രംപ് പ്രശംസിക്കുകയും “മികച്ച ആക്രമണമായിരുന്നു, ഇനിയും ഒരുപാട് വരാനിരിക്കുന്നു” എന്ന് അഭിപ്രായപ്പെടുകയും ചെയ്തിരുന്നു. ഇസ്രായേലിൻ്റെ നീക്കം മികച്ചതായിരുന്നുവെന്നും അവർക്ക് കഠിനമായി തന്നെ തിരിച്ചടി ലഭിച്ചുവെന്നും ട്രംപ് കൂട്ടിച്ചേർത്തു. ഇറാനിയൻ നേതൃത്വത്തെയും അദ്ദേഹം പരിഹസിച്ചു.
ഇറാഖിലെ ചില ജീവനക്കാരെ ഒഴിപ്പിക്കാനും മിഡിൽ ഈസ്റ്റിൽ നിന്ന് സൈനിക കുടുംബാംഗങ്ങൾക്ക് പിന്മാറാനുള്ള അനുമതിയും പെന്റഗൺ നൽകിയിട്ടുണ്ട്. ഇറാൻ-ഇസ്രായേൽ സംഘർഷം വർദ്ധിക്കുന്ന പശ്ചാത്തലത്തിൽ, മിഡിൽ ഈസ്റ്റിൽ വലിയ രീതിയിലുള്ള ഏറ്റുമുട്ടലുണ്ടാകുമെന്ന മുന്നറിയിപ്പും ട്രംപ് നൽകിയിട്ടുണ്ട്.
The post ഇറാൻ്റെ ആക്രമണങ്ങൾക്ക് ശക്തമായ മുന്നറിയിപ്പുമായി ഡോണൾഡ് ട്രംപ് appeared first on Metro Journal Online.
