ഹോങ്കോങ്ങിൽ ജനാധിപത്യപരമായ പ്രവർത്തനങ്ങൾക്ക് കടുത്ത തിരിച്ചടി: അവസാന പ്രോ-ഡെമോക്രസി പാർട്ടിയും പിരിച്ചുവിട്ടു
ഹോങ്കോങ്ങിലെ അവസാനത്തെ പ്രധാന ജനാധിപത്യ അനുകൂല പാർട്ടിയായ ലീഗ് ഓഫ് സോഷ്യൽ ഡെമോക്രാറ്റ്സ് (LSD) പിരിച്ചുവിട്ടതായി പ്രഖ്യാപിച്ചു. “വലിയ രാഷ്ട്രീയ സമ്മർദ്ദം” കാരണമാണ് ഈ തീരുമാനമെന്ന് പാർട്ടി അറിയിച്ചു.
ചൈനയുടെ കർശനമായ ദേശീയ സുരക്ഷാ നിയമം ഹോങ്കോങ്ങിൽ നടപ്പിലാക്കിയതിന് ശേഷം നിരവധി ജനാധിപത്യ അനുകൂല സംഘടനകളും മാധ്യമ സ്ഥാപനങ്ങളും അടച്ചുപൂട്ടുകയും പ്രവർത്തകർക്ക് തടവുശിക്ഷ ലഭിക്കുകയും ചെയ്തിരുന്നു. 2020-ൽ ദേശീയ സുരക്ഷാ നിയമം വന്നതിന് ശേഷം ഹോങ്കോങ്ങിലെ രാഷ്ട്രീയ സ്വാതന്ത്ര്യങ്ങൾ ഗണ്യമായി കുറഞ്ഞു. 2024-ൽ ആർട്ടിക്കിൾ 23 എന്ന പേരിൽ മറ്റൊരു കൂട്ടം നിയമങ്ങളും പാസാക്കിയിരുന്നു.
സ്ഥാപിതമായതിന് ശേഷം ഹോങ്കോങ്ങിലെ തെരുവുകളിൽ ചെറിയ പ്രതിഷേധങ്ങൾ സംഘടിപ്പിക്കുകയും ജനാധിപത്യത്തിനുവേണ്ടി ശബ്ദമുയർത്തുകയും ചെയ്ത ഏക പാർട്ടിയായിരുന്നു LSD. പാർട്ടി നേതാവ് ചാൻ പോ-യിംഗ്, തങ്ങൾ നേരിട്ട സമ്മർദ്ദത്തെക്കുറിച്ച് കൂടുതൽ വിശദീകരിച്ചില്ലെങ്കിലും, ഹോങ്കോങ്ങിന്റെ ജനാധിപത്യ പ്രസ്ഥാനത്തിന് തങ്ങളാൽ കഴിയുന്ന സംഭാവനകൾ നൽകിയതിൽ അഭിമാനമുണ്ടെന്ന് പറഞ്ഞു.
കഴിഞ്ഞ ഏപ്രിലിൽ ഹോങ്കോങ്ങിലെ ഏറ്റവും വലിയ ജനാധിപത്യ അനുകൂല പാർട്ടിയായിരുന്ന ഡെമോക്രാറ്റിക് പാർട്ടിയും പിരിച്ചുവിടുന്നതിനുള്ള നടപടികൾ ആരംഭിക്കാൻ വോട്ട് ചെയ്തിരുന്നു. ഈയൊരു സാഹചര്യത്തിൽ LSD-യുടെ പിരിച്ചുവിടൽ ഹോങ്കോങ്ങിലെ ജനാധിപത്യ അനുകൂല പ്രസ്ഥാനത്തിന് വലിയ തിരിച്ചടിയാണ്.
