ഒന്നിനും കൊള്ളാത്ത വനം മന്ത്രി ശശീന്ദ്രനെ കാബിനറ്റിൽ നിന്ന് പുറത്താക്കണമെന്ന് കെ മുരളീധരൻ

വനം മന്ത്രി എ കെ ശശീന്ദ്രനെതിരെ കോൺഗ്രസ് നേതാവ് കെ മുരളീധരൻ. വനം മന്ത്രിക്ക് ഒന്നിനും നേരമില്ലെന്നും സ്വന്തം പാർട്ടിക്കാരെ ചവിട്ടി പുറത്താക്കാനുള്ള തിരക്കിലാണ് മന്ത്രിയെന്നും അദ്ദേഹം പരിഹസിച്ചു. ഒന്നിനും കൊള്ളാത്ത വനം മന്ത്രിയെ പുറത്താക്കണമെന്നും വയനാട്ടിലെ ഹർത്താൽ സൂചനമാത്രമെന്നും അദ്ദേഹം വ്യക്തമാക്കി.

വന്യമൃഗങ്ങളുടെ എണ്ണം പെരുകുന്നു. മൻപ് കാട്ടാനയായിരുന്നെങ്കിൽ ഇന്ന് കടുവയും കരടിയും എല്ലാം നാട്ടിലേക്ക് വരുന്നു. ഇന്ന് മനുഷ്യൻ കാട്ടിലേക്കല്ല പോകുന്നത്. കാട്ടിലെ മൃഗങ്ങൾ നാട്ടിലേക്ക് വരികയാണ്. മന്ത്രിക്കാണെങ്കിൽ ഇതിനൊന്നും നേരവുമില്ല. മന്ത്രി സ്ഥാനം നിലനിർത്താനും സ്വന്തം പാർട്ടിക്കാരെ ചവിട്ടി പുറത്താക്കുന്നതിനുമിടയിൽ വന്യ മൃഗങ്ങളിൽ നിന്ന് പാവപ്പെട്ട കർഷകരെയും ആദിവാസികളെയും രക്ഷിക്കാൻ സാധിക്കാത്ത അവസ്ഥയിലാണ് അദ്ദേഹം എത്തിയിരിക്കുന്നത്.

ഒന്നിനും കൊള്ളാത്ത ഈ മന്ത്രിയെ ക്യാബിനറ്റിൽ നിന്ന് പുറത്താക്കണം പഴയകാലം പോലെയല്ല, ആധുനികമായ സങ്കേതങ്ങൾ ഇതിനായി കൊണ്ടുവരണം. അതല്ലാതെ പഴയ തുരുമ്പുള്ള തോക്കും വച്ചുകൊണ്ടൊന്നും വന്യ മൃഗങ്ങളെ നേരിടാൻ കഴിയില്ല. ശക്തമായ നടപടിയുണ്ടായില്ലെങ്കിൽ കേരളത്തിൽ തന്നെ ഹർത്താൽ പ്രഖ്യാപിക്കുമെന്നും മുരളീധരൻ പറഞ്ഞു