കൂടരഞ്ഞി (കോഴിക്കോട്): കൂമ്പാറയില്‍ പിക്കപ്പ് വാന്‍ നിയന്ത്രണം വിട്ട് മറിഞ്ഞ് അപകടം. അതിഥി തൊഴിലാളികളുമായി കക്കാടംപൊയിലില്‍ നിന്ന് വന്ന വാഹനമാണ് അപകടത്തില്‍പ്പെട്ടത്. ഒരാള്‍ മരിച്ചിട്ടുണ്ടെന്നും 15 ഓളം പേര്‍ക്ക് പരുക്കേറ്റതായും ആശുപത്രി വൃത്തങ്ങള്‍ അറിയിച്ചു. പരിക്കേറ്റവരെ സമീപത്തെ ആശുപത്രികളിലേക്ക് പ്രവേശിപ്പിച്ചു. ഇന്ന് രാത്രി ഏഴ് മണിക്കാണ് അപകടമുണ്ടായത്.
കോണ്‍ക്രീറ്റ് പണിക്കാരാണ് വാഹനത്തില്‍ ഉണ്ടായിരുന്നത്
അപകടത്തില്‍പ്പെട്ടവരെ ആംബുലന്‍സ് മാര്‍ഗം കുടരഞ്ഞി സെന്റ് ജോസഫ് ഹോസ്പിറ്റലിലേക്കും, മുക്കം കെഎംസിടി ഹോസ്പിറ്റലിലേക്കും കൊണ്ട് പോയി.
റോഡില്‍ നിന്ന് താഴ്ചയിലേക്ക് വീണ പിക്കപ്പ് വാന്‍ പൂര്‍ണമായും തകര്‍ന്നിട്ടുണ്ട്. ഏറെ പ്രയാസപ്പെട്ടാണ് പരുക്കേറ്റവരെ പുറത്തെടുത്തതെന്നും പരുക്കേറ്റവരില്‍ പലരുടെയും നില ഗുരുതരമാണെന്നും രക്ഷാപ്രവര്‍ത്തകര്‍ പറഞ്ഞു.
മിനി പിക്കപ്പ് വാന്‍ നിയന്ത്രണം വിട്ട് മറിയുകയായിരുന്നുവെന്നാണ് വിവരം.
മേലേ കൂമ്പാറയിലാണ് അപകടമുണ്ടായത്. അപകടം ഉണ്ടായ ഉടനെ നാട്ടുകാരാണ് രക്ഷാപ്രവര്‍ത്തനം നടത്തിയത്. ഫയര്‍ഫോഴ്‌സും സ്ഥലത്തെത്തി.
The post കോഴിക്കോട് കൂമ്പാറയില്‍ പിക്കപ്പ് വാന്‍ മറിഞ്ഞ് ഒരു മരണം appeared first on Metro Journal Online.
