വാമനപുരം നദിയിൽ കുളിക്കാനിറങ്ങിയ ഐഐഎസ്ടി വിദ്യാർഥി മുങ്ങി മരിച്ചു. ചെന്നൈ സ്വദേശി മോഹൻ രാജ് സുബ്രഹ്മണ്യനാണ് മരിച്ചത്. ഇന്ന് രാവിലെ എട്ട് മണിയോടെയാണ് യുവാവ് കുളിക്കാനിറങ്ങിയത്.
ഇന്ത്യൻ ഇൻസ്റ്റിറ്റ്യൂട്ട് ഓഫ് സ്‌പേസ് സയൻസ് ആൻഡ് ടെക്‌നോളജിയിലെ എംടെക് വിദ്യാർഥിയാണ് മോഹൻരാജ്. വാമനപുരം നദിയിലെ വിതുര താവക്കൽ വെള്ളച്ചാട്ടത്തിന് സമീപമാണ് ഒഴുക്കിൽപ്പെട്ടത്.
പാറക്കെട്ടിൽ നിന്നാണ് വിദ്യാർഥി തെന്നി വീണത്. പുഴയിൽ വീണതോടെ ഒഴുക്കിൽപ്പെട്ട വിദ്യാർഥിയെ കാണാതായി. തുടർന്ന് നാട്ടുകാരും അഗ്നിരക്ഷാ സേനയും നടത്തിയ തെരച്ചിലിലാണ് മൃതദേഹം കണ്ടത്. ഇന്നലെ പ്രദേശത്ത് ശക്തമായ മഴയുണ്ടായിരുന്നതിനാൽ പുഴയിൽ ഒഴുക്ക് കൂടുതലായിരുന്നു
