ടെൽ അവീവ്: ഇറാനെതിരെ ഒരു ‘ദീർഘകാല പോരാട്ടത്തിന്’ ഇസ്രായേൽ ജനത തയ്യാറെടുക്കണമെന്ന് ഇസ്രായേൽ പ്രതിരോധ സേന (ഐഡിഎഫ്) ചീഫ് ഓഫ് സ്റ്റാഫ് ലഫ്റ്റനന്റ് ജനറൽ ഐൽ സാമിർ പറഞ്ഞു. “ഇത്രയും വലിയ ഭീഷണിയെ ഇല്ലാതാക്കാൻ,” ഇത് ആവശ്യമാണെന്നും അദ്ദേഹം കൂട്ടിച്ചേർത്തു. ഇസ്രായേലി ജനതയെ അഭിസംബോധന ചെയ്തുകൊണ്ട് പുറത്തിറക്കിയ ഒരു വീഡിയോ സന്ദേശത്തിലാണ് സാമിർ ഈ സുപ്രധാന പ്രസ്താവന നടത്തിയത്.
ഇറാൻ വർഷങ്ങളായി “ഇസ്രായേൽ രാഷ്ട്രത്തെ നശിപ്പിക്കാൻ വ്യക്തമായ പദ്ധതികൾ” തയ്യാറാക്കുകയാണെന്നും, സമീപ മാസങ്ങളിൽ ഈ പദ്ധതികൾക്ക് “പ്രവർത്തനക്ഷമമായ കഴിവുകളായി” മാറിയെന്നും സാമിർ പറഞ്ഞു. ഇറാൻ ഒരു “വിനാശകരമായ ഭീഷണി” ഉയർത്തുന്നുണ്ടെന്നും, അതിനെ പ്രതിരോധിക്കാൻ തങ്ങൾ മുൻകൂട്ടി പ്രവർത്തിക്കുമെന്നും അദ്ദേഹം വ്യക്തമാക്കി.
“നമ്മുടെ ചരിത്രത്തിലെ ഏറ്റവും സങ്കീർണ്ണമായ സൈനിക നീക്കത്തിനാണ് നമ്മൾ ഇറങ്ങിത്തിരിച്ചിരിക്കുന്നത്,” സാമിർ പറഞ്ഞു. “ഇത്രയും വലിയ ഭീഷണിയെ ഇല്ലാതാക്കാനും ഇങ്ങനെയൊരു ശത്രുവിനെ നേരിടാനും ദീർഘകാല പോരാട്ടത്തിന് തയ്യാറെടുക്കേണ്ടതുണ്ട്.” ഐഡിഎഫ് ഇതിന് തയ്യാറാണെന്നും, ഓരോ ദിവസം കഴിയുന്തോറും തങ്ങളുടെ പ്രവർത്തന സ്വാതന്ത്ര്യം വർദ്ധിക്കുകയും ശത്രുവിന്റേത് ചുരുങ്ങുകയാണെന്നും അദ്ദേഹം കൂട്ടിച്ചേർത്തു.
ഈ പോരാട്ടം ഇനിയും അവസാനിച്ചിട്ടില്ലെന്നും, വെല്ലുവിളി നിറഞ്ഞ ദിവസങ്ങൾ ഇനിയുമുണ്ടെന്നും, ദൗത്യം പൂർത്തിയാകുന്നതുവരെ ജാഗ്രതയും ഐക്യവും പുലർത്തണമെന്നും അദ്ദേഹം ജനങ്ങളോട് ആഹ്വാനം ചെയ്തു. “ഒരുമിച്ച്, ഈ പോരാട്ടം ഇസ്രായേലിന്റെ മേൽക്കോയ്മയോടെ ഞങ്ങൾ പൂർത്തിയാക്കുമെന്ന് എനിക്ക് ആത്മവിശ്വാസമുണ്ട്,” സാമിർ പ്രസ്താവിച്ചു.
ഇസ്രായേലും ഇറാനും തമ്മിൽ ഒരാഴ്ചയിലേറെയായി തുടരുന്ന വ്യോമാക്രമണങ്ങൾക്കിടെയാണ് ഐഡിഎഫ് മേധാവിയുടെ ഈ മുന്നറിയിപ്പ്.
