തന്നെ ലൈംഗികമായി അധിക്ഷേപിച്ചെന്ന നടി ഹണി റോസിന്റെ പരാതിയില്‍ വ്യവസായിയും സാമൂഹിക പ്രവര്‍ത്തകനുമായ ബോബി ചെമണ്ണൂര്‍ എന്ന ബോച്ചെക്കെതിരെ കേസ് എടുത്ത് പോലീസ്. ജാമ്യമില്ലാവകുപ്പ് ചുമത്തിയാണ് പോലീസ് കേസ് എടുത്തത്.
എറണാകുളം സെന്‍ട്രല്‍ പൊലീസിനാണ് നാല് മാസം മുന്‍പ് നടന്ന സംഭവത്തില്‍ നടി പരാതി നല്‍കിയത്. ഭാരതീയ ന്യായ് സംഹിത 75ാം വകുപ്പ് പ്രകാരമാണ് പരാതിയില്‍ എറണാകുളം സെന്‍ട്രല്‍ പൊലീസ് കേസെടുത്തിരിക്കുന്നത്.
സ്വര്‍ണ്ണവ്യാപാര സ്ഥാപനത്തിന്റെ ഉദ്ഘാടനത്തിനിടയില്‍ ഉടമ നടത്തിയ ദ്വയാര്‍ത്ഥ പ്രയോഗങ്ങള്‍ക്കും കമന്റുകള്‍ക്കുമെതിരെ നടി നേരത്തെ പരസ്യമായ വിമര്‍ശനവുമായി രംഗത്ത് വന്നിരുന്നു. സോഷ്യല്‍ മീഡിയയിലൂടെ നടത്തിയ പരാമര്‍ശങ്ങളുടെ പേരില്‍ നടിക്ക് വ്യാപകമായ സൈബര്‍ ആക്രമണം നേരിടേണ്ടിവന്നിരുന്നു. അപ്പോള്‍ മോശം കമന്റിട്ടവര്‍ക്കെതിരെ പരാതി നല്‍കിയിരുന്നു. അന്ന് പക്ഷെ ബോച്ചെക്കെതിരെ നടി പോലീസില്‍ പരാതി നല്‍കിയിരുന്നില്ല. ഇന്ന് സെന്‍ട്രല്‍ സ്റ്റേഷനില്‍ നേരിട്ടെത്തിയാണ് നടി ബോച്ചെക്കെതിരെ പരാതി നല്‍കിയത്.
അതേസമയം, ബോബി ചെമ്മണ്ണൂര്‍ തനിക്കെതിരായ ആരോപണം നിഷേധിച്ചിട്ടുണ്ട്. മോശമായി ഒന്നും താന്‍ പറഞ്ഞിട്ടില്ലെന്നും ഹണി റോസിന് വിഷമമുണ്ടായതില്‍ തനിക്കും വിഷമമുണ്ടെന്നും അദ്ദേഹം പറഞ്ഞു.
The post ബോച്ചെക്കെതിരെ കേസ് ജാമ്യമില്ലാ വകുപ്പ് പ്രകാരം കേസ് എടുത്തു appeared first on Metro Journal Online.
