അജ്മാന്‍: കാണാതായ ഏഴു വയസുകാരനെ റെക്കാര്‍ഡ് വേഗത്തില്‍ രക്ഷിതാക്കളെ തിരിച്ചേല്‍പ്പിച്ച് അജ്മാന്‍ പൊലിസ്. ഒരു മണിക്കൂറിനകമാണ് കുട്ടിയെ പൊലിസ് രക്ഷിതാക്കള്‍ക്ക് കണ്ടെത്തി കൈമാറിയത്. അജ്മാനിലെ മെയിന്‍ റോഡില്‍ ഒറ്റപ്പെട്ടുപോയ ഏഷ്യന്‍ ബാലനെയാണ് പൊലിസ് കണ്ടെത്തിയത്.
മനാമ മേഖലയില്‍ രക്ഷിതാക്കളില്ലാതെ ബാലന് നില്‍ക്കുന്നത് ശ്രദ്ധയില്‍പ്പെട്ട അറബ് വംശജന്‍ കുട്ടിയെ അജ്മാന്‍ പൊലിസിന് കൈമാറുകയായിരുന്നൂവെന്ന് മനാമ പൊലിസ് സെന്റര്‍ തലവന്‍ അഡ്വ. മുഹമ്മദ് റാശിദ് അല്‍ മത്‌റൂശി വെളിപ്പെടുത്തി. അതുവരെയും ആരും തങ്ങളുടെ കുഞ്ഞിനെ കാണാതായതായി എവിടെയും റിപ്പോര്‍ട്ട് ചെയ്തിരുന്നില്ല. ഇതോടെ പൊലിസ് കുട്ടികളുടെ രക്ഷിതാക്കളെ തപ്പി ഇറങ്ങുകയായിരുന്നു. ഇതിനിടയില്‍ പൊലിസ് ബാലന് ഊണ്‍ ഉള്‍പ്പെടെയുള്ളവ നല്‍കി സന്തോഷമാക്കി നിര്‍ത്താനും ശ്രദ്ധിച്ചിരുന്നു. വളരെ വേഗം കുട്ടിയുടെ രക്ഷിതാക്കളുടെ ഫോണ്‍ നമ്പര്‍ കണ്ടെത്തുകയും സ്റ്റേഷനിലേക്കു വിളിച്ചുവരുത്തി കുട്ടിയെ കൈമാറുകയുമായിരുന്നു.
